فيدورا بتكتب نهاية عصر الـ Kernel Console التقليدية!

 

 

فيدورا بتكتب نهاية عصر الـ Kernel Console التقليدية!

عمرك سألت نفسك الشاشة السودا اللي بتظهرلك أول ما بتفتح جهاز لينكس أو لما الواجهة الرسومية (GUI) بتهنج وتدوس Ctrl+Alt+F2. دي عبارة عن إيه؟

دي يا سيدي الـ Kernel Console. بقالنا سنين وسنين بنعتمد فيها على تقنية قديمة اسمها fbcon. بس يبدو إن فيدورا قررت إن الوقت حان لثورة معمارية صغيرة في النسخة الجاية (44) عشان تتخلص من الإرث ده.

ليه التغيير ده مهم؟

المشكلة في الكونسول الحالي fbcon هو عبارة عن Legacy Code (كود قديم) عايش ومحشور جوه الـ Kernel نفسه. يعني هنا مش بس إنه قديم، الأخطر إنه شغال في الـ Kernel Space. ودي حاجة تعني لو الكونسول ده حصله Crash لأي سبب، بيسحب النظام كله معاه ويحصل Kernel Panic . ده غير إن ميزة الـ Scrolling (إنك تطلع فوق تشوف الـ Logs القديمة) اتلغت منه بقالها فترة بسبب ثغرات أمنية.

طيب والحل كان إيه؟

فريق فيدورا قرر يستبدل القديم بحاجة اسمها kmscon والفرق الجوهري هنا هو الـ Architecture. الـ kmscon بيشتغل في الـ Userspace (مساحة المستخدم)، زيه زي أي برنامج عادي أو خادم عرض (Display Server).

إيه العائد التقني من النقلة دي؟

أهم حاجة لو الـ Console الجديد هنج أو ضرب، الـ Kernel هيفضل سليم والجهاز هيفضل شغال وتقدر تعمل Restart للخدمة من غير ما تعمل ريستارت للجهاز كله.

 

برضه الـ Scrolling بقى موجود وتقدر تستخدم Fonts أفضل ودعم كامل للـ Unicode وحتى اختصارات الكيبورد (Layouts) هتبقى متطابقة مع اللي بتستخدمه في الواجهة الرسومية.

 

بالمختصر فيدورا كعادتها بتاخد المبادرة. التغيير ده مش مجرد تحديث شكلي، ده تغيير مهم لنقل مكون حساس من قلب النظام لمساحة التطبيقات عشان النظام يكون أكتر استقرار وأمان وغالبا باقي التوزيعات هتبدأ تمشي على نفس النهج قريب.