نتكلم عن 3 تحديثات محورية لبرمجيات وأدوات بنعتمد عليها بشكل كبير وهي VLC وخدمة Let's Encrypt وأداة TLP.

 

 

 

نتكلم عن 3 تحديثات محورية لبرمجيات وأدوات بنعتمد عليها بشكل كبير وهي VLC وخدمة Let's Encrypt وأداة TLP.

نبتدي ببرنامج #VLC الغني عن التعريف!

في التحديث الجديد المطورين بدأوا يدعموا مكتبات Qt6 (المسؤولة عن الواجهة الرسومية) وده بيمهد الطريق لنسخة VLC 4.0 المنتظرة. ده معناه أداء أفضل وتوافق أكبر مع الأنظمة الحديثة.

برضه تم إضافة خيار للـ Dark Palette، عشان الواجهة تكون متناسقة مع إعدادات نظامك لو بتستخدم Dark Theme وده كان مطلب جماهيري لراحة العين.

نقطة تهمك لو بتستخدم ويندوز على معالجات ARM، التحديث ده بيدعم جهازك بشكل Native.

في الناحية التانية خدمة #LetsEncrypt قررت تقلص عمر الشهادات لـ 45 يوم؟

الخدمة دي اللي بتأمن ملايين المواقع بشهادات SSL مجانية، أعلنت خطة لتقليل صلاحية الشهادة من 90 يوم لـ 45 يوم بحلول عام 2028.

اللي يهمك في الخبر ده لو انت بتدير سيرفرات وبتعتمد على التجديد التلقائي مش هتحس بفرق كبير. التغيير ده بيشجع مديري الأنظمة إنهم يعتمدوا كليا على الـ Automation بدل التجديد اليدوي وده بيصب في مصلحة استقرار الويب عموما.

نختم بخبر التحديث الجديد لأداة TLP!

معروف عن الأداة دي إنها الرفيق الأساسي لأي مستخدم لينكس على اللابتوب وفي النسخة الجديدة تم إضافة tlp-pd daemon وده وسيط بيسمح لواجهات سطح المكتب زي #GNOME و KDE إنها تكلم TLP مباشرة.

نشرح أكتر!

زمان كنت محتاج تيرمينال عشان تظبط الإعدادات. دلوقتي، تقدر تغير بين وضع توفير الطاقة والأداء العالي من قائمة البطارية العادية في النظام وTLP هينفذ الأوامر المعقدة في الخلفية بشكل تلقائي.