كتير مننا لما بيسمع سيرة ArchLinux بيجي في باله فورا السرعة والأداء بس في نفس الوقت بيخاف من التعقيد ومشاكل التعريفات اللي ممكن تضيع يوم كامل عشان تحلها!
كتير مننا لما بيسمع سيرة ArchLinux بيجي في باله فورا السرعة والأداء بس في نفس الوقت بيخاف من التعقيد ومشاكل التعريفات اللي ممكن تضيع يوم كامل عشان تحلها!
النهاردة معانا خبرين مهمين وتحديدا لتوزيعتين هما الأقوى حاليا في تبسيط تجربة Arch وهما EndeavourOS و CachyOS. تعالوا نشوف التحديثات دي بتقدم إيه جديد وبتحل مشاكلنا إزاي.
في الأول نشوف EndeavourOS وتحديث Ganymede.. نهاية صداع نفيديا.
لو أنت مستخدم لـ Nvidia، أكيد واجهت قبل كده الحيرة بين التعريفات المفتوحة والمغلقة وممكن الشاشة تسود منك وأنت بتسطب.
إيه الجديد؟ في النسخة دي اللي سموها Ganymede المطورين حلوا المشكلة ودلوقتي التوزيعة بقت بتعرف نوع كارت الشاشة بتاعك لوحدها وبتقرر هل هو محتاج التعريف الرسمي ولا المفتوح وبتحمله وتسطبه أوتوماتيك سواء في الـ Live Session أو بعد التسطيب.
برضه التوزيعة جاية بأحدث نواة (6.17) وواجهة Plasma 6.5.3، يعني أداء واستقرار أعلى بكتير.
ملحوظة مهمة: لو بتستخدم Windows11 مع لينكس (Dual Boot) على هاردين مختلفين، خد بالك إن ممكن تواجه مشكلة بسيطة في البوت، فراجع الـ Release Notes قبل التسطيب.
في الناحية التانية CachyOS.. السرعة والشمولية
التوزيعة دي مشهورة إنها موجهة للأداء العالي (Performance)، بس في التحديث الأخير، التركيز كان على إتاحة النظام للجميع.
وكمان لأول مرة، التسطيب بقى بيدعم أدوات زي قارئ الشاشة Orca. ده معناه إن ذوي الهمم يقدروا يسطبوا النظام بنفسهم وبسهولة ودي خطوة ممتازة في عالم لينكس.
نقطة تانية وهي لو معاك جهاز زي ASUS ROG Ally، التوزيعة بقت بتدعم الأجهزة دي بشكل أفضل بكتير من غير ما تحتاج تظبط إعدادات معقدة.
الخلاصة.. الكلام ده يفرق معاك في إيه؟
التحديثات دي بتكسر الحاجز النفسي بين المستخدم العادي وبين قوة Arch Linux. فكرة إن النظام يفهم الهاردوير بتاعك لوحده أو إنه يدعم ذوي الهمم من شاشة التسطيب، دي نقلة بتقول إن لينكس مابقاش بس للمبرمجين والـ Geeks، ده بقى جاهز لأي حد عايز نظام سريع ومستقر.