نتكلم شوية عن التحديث الجديد اللي نزل لنظام FreeBSD!
نتكلم شوية عن التحديث الجديد اللي نزل لنظام FreeBSD!
عشان ناس كتير بتسمع الاسم ده وبتفتكره توزيعة لينكس وهما مش عارفين إن ده نظام تاني خالص وليه هيبة في عالم التقنية.
إيه هو أصلا؟
بص يا سيدي، FreeBSD ده نظام تشغيل متكامل بس هو مش لينكس. هو سليل مباشر لنظام UNIX الأصلي اللي اتعمل في السبعينات في معامل Bell. يعني تقدر تعتبره العم الكبير أو الأصل بتاع الأنظمة المفتوحة المصدر.
إيه اللي بيميزه عن لينكس؟
بس لو جينا على FreeBSD فهو مش مجرد توزيعة زي ما بنشوف في عالم لينكس، هو نظام كامل بيتم تطويره ككتلة وحدة، يعني الفريق المطور للنظام هو نفسه اللي بيطور النواة (Kernel) وهو اللي بيطور التعريفات وهو اللي بيعمل الأدوات الأساسية (Userland utilities). ده بيخلي النظام متناغم ومنظم بشكل دقيق.
نرجع نتكلم عن التحديث الجديد!
النسخة دي (15.0) جاية بأحدث كود لملفات النظام OpenZFS وتحديثات مهمة في OpenSSL و OpenSSH. يعني من الآخر، أمان وسرعة وأداء أحسن بكتير للداتا بتاعتك والسيرفرات.
برضه دلوقتي تقدر تعمل Build للنظام كله من غير ما تحتاج صلاحيات الـ root ودي حاجة بتعلي الأمان وكمان الـ Reproducible Builds بقت شغالة تمام ودي ميزة بتضمن إن الكود المصدري بيطلع نفس النسخة النهائية بالظبط كل مرة، حاجة مهمة للشركات والناس اللي بتدور على الموثوقية.
نقطة تهم أي مستخدم عادي عايز يجرب FreeBSD على جهازه الشخصي وهي تحسينات كبيرة في دعم الواي فاي (خصوصا كروت Intel الجديدة WiFi 6)، وكروت الشاشة ومشاكل الـ Suspend/Resume اللي كانت بتضايق الناس زمان، كلها اتظبطت. كمان في دعم لمعالجات إنتل من جيل Tiger Lake لحد Meteor Lake.
الخلاصة، الإصدار ده بيثبت إن FreeBSD مش بس نظام كلاسيكي للسيرفرات التقيلة، ده كمان بيقرب جدا من المستخدم العادي والمطورين اللي عايزين بيئة عمل مستقرة وحديثة على أجهزتهم الشخصية. الدعم القوي للهاردوير الجديد والسهولة في إدارة الحزم بتقول إن المشروع ماشي في الطريق الصح عشان يبقى خيار عملي لأي حد بيحب الأوبن سورس.