أبل بترتب لـ"ري ستارت" كبيرة في مجال الذكاء الاصطناعي، ومش بس بالسوفتوير.. لكن بأجهزة جديدة كلياً.
أبل بترتب لـ"ري ستارت" كبيرة في مجال الذكاء الاصطناعي، ومش بس بالسوفتوير.. لكن بأجهزة جديدة كلياً.
الشركة شغالة على روبوت مكتبي متطور، هيكون محور استراتيجيتها الجديدة، ومقرر ينزل الأسواق سنة 2027. الروبوت ده شكله زي آيباد صغير متثبت على ذراع متحرك يقدر يلف ويغير وضعيته نفسه عشان يتابع أي شخص في الغرفة، زي الرأس البشري. يقدر يبص على اللي بيناديه أو حتى يحاول يجذب انتباه اللي مش باصص له. ناس كتير سموه "مصباح بيكسار" عشان تصميمه قريب من شعار الشركة الشهيرة.الروبوت هيبقى موجود على مكتبك أو في المطبخ، يساعدك في إنجاز المهام، استهلاك المحتوى، وتنظيم جدولك اليومي. كمان هيكون عنده قدرة يدخل وسط محادثة مجموعة أشخاص: مثلاً لو بتتكلموا عن خروجة، يرشح مطاعم قريبة أو وصفات أكل. ولو بتعمل مكالمات فيس تايم، الكاميرا بتاعته هتتحرك تركز على المتكلم. أبل كمان بتختبر ميزة تخليك تستخدم شاشة الآيفون كـ "ريموت كنترول" تحرك بيها الروبوت أثناء المكالمات.
بجانب الروبوت، أبل عندها خطط تانية:
شاشة ذكية مستقلة (اسمها الكودي J490) هتنزل في منتصف السنة الجاية، نسخة مبسطة من الروبوت من غير الذراع أو سيري المطور. هتشتغل كمركز للتحكم في البيت الذكي: تشغيل موسيقى، مكالمات فيس تايم، ملاحظات، تصفح إنترنت. تصميمها مربع بحواف رفيعة وألوان أسود أو أبيض، مقاس 7 بوصات ومرتكزة على قاعدة نصف كروية. ممكن كمان تتعلق على الحيطة.
مكبر صوت ذكي بشاشة هينزل السنة الجاية برده، بسعر أقل، عشان يدخل المنافسة في سوق الأجهزة المنزلية الذكية.
كاميرات أمن منزلية ذكية (اسمها الكودي J450) شغالة بالبطارية بعمر افتراضي لحد سنة كاملة على الشحنة الواحدة، فيها مستشعرات Infrared وتقنية التعرف على الوجوه، عشان تقدر تعمل أوتوميشن للبيت زي إغلاق الإضاءة أو تشغيل موسيقى معينة بمجرد دخول شخص محدد. كمان الشركة بتختبر جرس باب ذكي يفتح بالتعرف على الوجه.
كل الأجهزة دي هتشتغل على نظام تشغيل جديد اسمه Charismatic، معمول مخصوص للروبوت والشاشة الذكية. النظام بيدعم تعدد المستخدمين، وبيعتمد على "وجوه الساعة" (Clock Faces) و"ويدجيتس" لإنجاز المهام السريعة. التصميم واخد فلسفة بين أنظمة Apple TV وApple Watch. ومن المزايا إن الجهاز يتعرف على وشك بالكاميرا ويغير الواجهة حسب تفضيلاتك.
سيري.. التغيير الأكبر في تاريخ المساعد الصوتي
أبل حاطة "سيري" في قلب الخطة كلها. النسخة الجديدة مش مجرد مساعد يفتحلك التطبيقات، لكنها مبنية على نماذج لغوية ضخمة (LLMs) تخليه يتعامل جوه التطبيقات كأنك إنت اللي بتتعامل:
- يلاقي صورة معينة ويعدلها ويبعتها.
- يكتب تعليق على بوست في إنستجرام.
- يتصفح أبلكيشن تسوق ويضيف منتج.
وحاليا بيتجرب مع أوبر، واتساب، يوتيوب، فيسبوك وغيرهم.
التقنية دي مبنية على إطار برمجي جديد اسمه App Intents، وده حجر الأساس لكل منتجات أبل الجاية في البيت الذكي والروبوتات. لكن بسبب صعوبة التطوير، الإطار اتأخر وده أدى لتأجيل الشاشة الذكية سنة كاملة.
جوا أبل، النسخة الجديدة لسيري ليها كود نيم Linwood، وده معتمد على استخدام نماءج أبل الذكية نفسها المطورة جوا الشركة، وفي مشروع موازي اسمه Glenwood بيدرسوا فيه استخدام نماذج خارجية زي Anthropic. ولسه القرار النهائي متاخدش. من الناحية الشكلية، أبل بتجرب تعمل سيري له شخصية بصرية، فكرة أطلقت عليها اسم Bubbles، أشبه بفقاعات متحركة أو شخصيات ميموجي. فيه اختبارات كمان إنه يظهر كنسخة متحركة من أيقونة Finder المشهورة (الوجه المبتسم بتاع ماك) على طريقة Clippy القديم بتاع مايكروسوفت اوفيس!
رأيي الشخصي المتواضع أبل شايفة إن مستقبلها في الروبوتات والبيت الذكي، وسيري المطور هو العمود الفقري للاستراتيجية دي. بعد ما ألغت مشاريع زي السيارات ذاتية القيادة، الشركة بترهن على الخط الجديد ده عشان تثبت إنها لسه قادرة على الابتكار وتنافس سامسونج، أمازون، جوجل، وميتا في السوق.